Rev 9 | TPZ | STEP | Ka vatönim ankeroß piu en pa suvin peß. Köß ep in a vesun vëh to vuß taneß maß pa akis, pareß vuß manih po oeh. Ee to heß poë a kiß va pa koveß ruruvun vëh no a hikta ö neß to aton non.

Revelation of John 9

A Vatönim Ankeroß To Piu A Suvin

1 Ka vatönim ankeroß piu en pa suvin peß. Köß ep in a vesun vëh to vuß taneß maß pa akis, pareß vuß manih po oeh. Ee to heß poë a kiß va pa koveß ruruvun vëh no a hikta ö neß to aton non. 2 A vesun to peret en pa koveß ko öh apuh vëh to teß va non manih po öh va pa suraß to tavus maß, ko kopös en pa potan me a akis, ka muhin pah popoen en. 3 Ko kokaß tavus taneß ee manih po öh, ko kunah ee maß po oeh. Ee to heß raoe o kikis, vamanih pa ö no pipihkatan to teß va ne. 4 Ee to kon a soe vamanih pan, “Eöm se koe a miröß a karas me a ma moeh tah varih to pupu ne po tonun o oeh, me a ma naon. Eöm se miröß varoe a napan varih to hikta teß me ne o vëknöm va pe Sosoenën manih pa naire. 5 Eöm se heß o kamis manih pa napan poë varih, keß onöt a tönim sivö. Ivëhkëk, eöm se nat nem ip vamët raoe.” O kamis vëh nee se kon se teß va non manih pa kot pa pipihkatan. 6 Koman a tönim sivö a napan poë varih se pah iu mët këh e ne o kamis. Ivëhkëk, ee se hikta taum ne a mët.

7 Eöß to ep in o kokaß poë varih to teß va ne manih po hös to vamatop ne a vapus. Manih pa pasuire, a tah to matan va non manih po uvan pa teß sunön nee to nok pa gol nee to uvan ne, ka ma matëëre to teß va non manih pa matëëro teß. 8 A ma uviire to rëërë va non manih pa uviiro köövo, ka ma riu rivoeere teß va ne manih pa ma riu rivon a laëon. 9 Manih pa ma poeere, ee to ohop ne a ma ohop nee to nok po si kap, ka paknëëre tatanih va non manih po karis peo, no hös to rëhrëh vëvëhöß nö ne po vapus. 10 Ee to teß me ne a ma apiire to vapihpih vakmis vamanih pa pipihkatan. A ma apiire to teß me non o kikis marën a vakmis a ma napan koman a tönim sivö. 11 Ee to teß me ne a teß susun to matop non raoe. A teß sunön pamëh, eß a ankeroß to susun non pa matop a koveß ruruvun pamëh no a hikta ö neß to aton non. Po to Hibru, ee to pokaß ne a teß sunön pamëh, e Abadon. Ka manih po to Grik, ee to pokaß ne poë e Apolyon, keß a teß va pa miröß a ma moeh tah.

12 A punis apuh vamomoaan to hik en, ka meh poa punis to meß e ne pa tavus amot.

13 Ka vatönim me a paeh ankeroß piu en pa suvin peß. Köß tënan o vaato to taneß maß po taanaß noton ^{▼▼[... o vaato to taneß maß po taanaß noton ...] Manih po taanaß noton in a pok gol to sun non a tah to matan va non manih pa köm in a purmakaöß.} va pa pok gol vëh to teß non matan e Sosoenën. 14 Eß to soe ke a vatönim me a paeh ankeroß vëh to öt non a suvin vamanih pan, “Eën se vatvus a taanaß ankeroß varih to teß ne pa nohnoh sinten a ruen apuh vëh a Iupretis, kee nö ee.” 15 Ee a taanaß to tavus këh ee pa nohnoh. Eß se teß va non manih, pea se keh ki a napan po kukön hum, manih komön o pöh hum o ankeroß to vamatop ro ne a aoaß pamëh, me o poen, me a sivö, me o kirismas nee se ip vamët a napan kurus to teß ne nën. 16 Ee to nö, pare ununun a nap vëvënsun peo pa vapus. Ee to soe ka neoß a nap vëvënsun varih to tok ne po hös to antoen ne a 200 milion.

17 Eöß to tata noß, paröß ep in o hös no a napan to tok ne. Ee to ohop ne a ma ohop nee to nok po si kap. A ma ohop kap pee to ereraß va non manih po tëkrea, me ee o totomoen, me ee o vovoaßruvi. A ma pasuiro hös to teß va ne manih pa pasun a laëon, ka manih pa rivoeere, o suraß, me o vös sölpaß, me o öh to tatavus no maß. 18 A kukön tah poë varih, o suraß, ko öh, me o vös sölpaß, to tatavus taneß no maß pa rivoeero hös, ko ipip vamët e ne pa napan varih po vakön hum. 19 O kikis po hös to teß non pa rivoeere, me manih pa apiire. A ma apiire to teß va non manih po kahoß kuruß, eß marën a vakmis a ma napan.

20 A napan varih no o suraß, me o öh, me o vös sölpaß to hikta ip vamët, eße to hikta panih a ma taateß hat pee. Ko hikta vahik pa hin suk a tuvuh hat, me a ma tah nößnës nee to nok pa gol, me a silvaß, me pa bras, me po vös, me po naon. A ma tah nößnës poë varih to hikta onöt ne a ep ka ra, me tënan a ra, me a nö. 21 A ma napan varih to ip vamët akuk voh o meoh upöm teß, me a nap kakaveo, me a nap ororaß teß, me a nap rëhrëh. Ivëhkëk, ee to hikta panih a ma taateß hat pee.